Wasiirkii Hore Ee Wasaarada Dhalinyarada Iyo Ciyaaraha Somaliland Oo Ka Hadlay Xil Ka Qaadistiisa

maydhaneHargeysa (DMG)- Wasiirkii hore ee dhallinyarada iyo ciyaaraha Somaliland Md. Cabdilaahi Faarax Maydhane oo habeen hore ka mid ahaa xubnihii wasiiradda ahaa ee Madaxweyne Siilaanyo xilka-ka-qaadey, ayaa markii ugu horeysay ka hadlay sida uu u arko xil-ka-qaadista lagu sameeyay, waxaanu sheegay in xil-ka-qaadistiisa uu u arkayo wax caadiya, maadaama buu yidhi xilku meerto yahay.

Ex-Wasiir Cabdilaahi Faarax Maydhane, Oo Xilka ka qaadistiisa ka hadlaaya ayaa yidhi “Xilku waa wareegto oo maalinba nin baa qabta, markaa si caadiya ayaan u arkaa, waayo xilku waa wareegto, Madaxweynuhuna wuu ku mahadsan yahay muddadaa uu shaqada i gartay ee aan u shaqeeyay qaranka. Waxaan wareejinayaa ammaano culus, waxaana u mahad-celinayaa ILAAHII  muddadii aan hayey igu asturay”.

Wuxuu sii raaciyey hadalkiisi “Waan soo dhaweynayaa wasiirka cusub ee aan xilka ku wareejinayo, waxaanan ILAAHAY uga rajeynayaa inuu ku asturo, aad baan ugu faraxsanahay inaan si qurux baddan oo niyad-samaan ah aan xilka ugu wareejiyo wasiirka cusub, waayo xilku waa wareegto, waana ammaano”.

Ugu dambeyntii, Wasiirkii hore ee dhallinyarada iyo ciyaraha Md. Cabdilaahi Faarax Maydhane ayaa Madaxweyne Siilaanyo uga mahad-celiyay fursadii uu u siiyey inuu ka mid noqdo gollaha wasiiradiisa “Madaxweynaha waxaan si niyad-sami ah uga mahad-celinaya muddadii aan la soo shaqeeyay ee aan ka mid ahaa gollihiisa wasiiradda, waxaanan ku hambalyaynayaa Madaxweynaha xilka uu iga qaaday kuna taageerayaa, waana sunnaha dawladnimo, aad iyo aad-na waan ugu farax sanahay. Madaxweyne sidii aan kuula shaqayn jiray iyo si ka wanaagsan ayaan kuula shaqeynayaa, xisbiga KULMIYE-na sidii ayaan u ahay, mana ahi mid ka tegi doona, isaga ayaan hawsha la wadi doonaa Insha Allah”.

Leave a Reply

This site uses Akismet to reduce spam. Learn how your comment data is processed.

%d bloggers like this: