YEMEN: Xuutiyiinta Oo Dilay Cali Cabdalle Saalax

Yemen (Dhamays) – Wararka ka imaanaya dalka Yemen ayaa sheegaya in Madaxweynihii hore ee dalkaasi Cali Cabdalla Saalax lagu dilay dagaal uu Xuutiyiinta kula galay magaalada Sanca.

Telefiishan ay Xuutiyiinta maamulaan oo lagu magacaabo al-Masirah ayaa baahiyay muuqaalka nin Wasiirka Arrimaha gudaha lagu sheegay oo shaacinaya in “la soo afjaray dhibaatada Maleeshiyada khiyaanada qaran sameysay, lana dilay Hoggaamiyahooda”.

Dad ka tirsan Xisbiga Mr Saalax ayaa sidoo kale xaqiijiyay geeridiisa, sida uu baahiyay TV-ga Al-Carabiya.

Sawirro iyo muuqaallo lagu baahiyay baraha bulshada waxay muujinayaan Meydka Qof u eg Cali Cabdalle Saalax oo dhaawacyo xun ay ka gaadheen madaxa.

Xisbiga siyaasadeed ee uu ka tirsan yahay ayaa beeniyay in la dillay xilli hore, ka dib markii kooxda Xuutiyiinta ay qarxiyeen gurigiisa ku yaalla caasimadda Yemen ee Sanca.

Wixii ka horeeyay Toddobaadkii tagay, taageerayaasha Cali Cabdalla Saalax waxay la safnaayeen ururka shiicada ah ee Xuutiyiinta, waxayna dagaal kula jireen dowladda Yemebn ee Sucuudiga uu taageero.

Madaxweyne Cabdrabbuh Mansuur Haadi oo la doortay ka dib markii Saalax xilka looga tuuray kacdoon ayaa xarun ka dhigtay Sacuudiga.

Balse, khilaaf siyaasadeed iyo muran dhanka maamulka ee Masaajidka wayn ee ku yaalla meesha mucaaradka ay maamulaan ee Sanca ayaa sababay dagaal culus oo oo dhex maray taageerayaasha Cali Cabdalla Saalax iyo maleeshiyada Xuutiyiinta.

Ugu yaraan 125 Qof ayaa ku dhimatay, 238 kalena way ku dhaawacmeen dagaalka oo socday tan iyo Arbacadii la soo dhaafay.

Sabtidii, Saalax wuxuu ku baaqay “in bog cusub la furo” oo uu taageerayo Mr Haadi, haddii isbeheysiga Sacuudiga uu hoggaaminayo ay joojiyaan weerarka Yemen iyo xannibaadda xun ee ay ku hayaan.

Isbeheysiga iyo dowladda Cabdurabah Mansuur Haadi ayaa soo dhoweeyay hadalkaasi. Balse, Xuutiyiinta waxay Saalax ku eedeeyeen in uu “afgembiyeyo isbeheysi “aanu weligii aaminin”.

Xalay, magaalada Sanca waxaa ruxay duqeynta ay geysanayaan dowladaha uu hor kacayo Sacuudiga, waxaana lala eegtay Xuutiyiinta. Sidoo kale dagaal dhulka ah ayaa la isu adeegsaday hub culus. Hay’adaha gargaarka waxay sheegeen in shacab badan ay ku go’doomeen meesha uu dagaalka culus ka socday

Maanta, salaaddii duhur ka dib, guriga Cali Cabdalla Saalax ayaa la qarxiyay. Weli ma cadda in Saalax uu ku jiray guriga, balse saacado ka dib qaraxa, waxaa soo baxay wararka sheegaya in uu dhintay.

Muuqaal aan la xaqiijin oo baraha bulshada lagu baahiyay wuxuu muujinayaa mayd la sheegay in uu Saalax yahay oo lagu waday busta gaduudan. Waxaa siday rag hubeysan oo ku qeylinayay “Allahu akbar” iyo “Cali Cafashi-yoow!” – taas oo ay ula jeedaan qabiilka uu ka soo jeedo.

Xakim Almasmari, oo ah tifaftiraha Wargeyska Yemen Post ayaa TV-ga Al Jazeera u sheegay in dableyda Xuutiyiinta ay rasaas ku fureen kolonyada Saalax oo maraysay bar-koontorool oo ku taalla Koonfurta Sanca. Wuxuu ku sii socday deegaanka uu ka soo jeedo ee Sanhan.

Cali Cabdalla Saalax wuxuu Madaxweyne ka noqday Waqooyiga Yemen, 1978-kii, Markii Yemen ay midowday 1990-kii, wuxuu Madaxweyne u noqday Jamhuuriyaddii cusbeyd ee Yemen.

Xuutiyiinta oo doonayay in ay go’aan Shiicada Zaidi ee laga badan yahay, ayaa Saalax la dagaallamay, laga soo billaabo 2004 illaa 2010-kii.

Waxay sidoo kale taageereen kacdoonkii 2011, xilka looga tuuray Cali Cabdalla Saalax, wuxuuna xilka ku wareejiyay ku xigeenkiisii, Cabdurabah Mansuur Haadi.

Taageerayaasha Saalax ayaa ku biiray kacdoonka Xuutiyiinta ee lagu qabsaday Sanca 2014. Horraantii sannadkii 2015, madaxweyne Haadi wuxuu ku qasbanaaday in uu Cadan u guuro, ka dibna Sacuudiga. faragelinta isbeheysiga Sacuudiga ayaan ah in Haadi dib loogu celiyo maamulka dalka Yaman.

In ka badan 8,670 qof ayaa lagu dilay, 49,960 kalena waa lagu dhaawacay dagaalka bilowday ka dib markii isbeheysiga Sacuudiga uu farageliyay Yaman sannadkii 2015-kii, sida ay sheegtay Qaramada Midoobey.

Dagaalka iyo go’doominta ayaa sababay 20.7 milyan oo qof in ay si adag ugu baahdaan gargaar bini-aadamnimo. Arrintaas ayaa lagu tilmaamay in ay tahay cunta la’aanta ugu xun Caalamka, waxaana ka dhashay daacuun dilay 2,211 qof, tan iyo bishii April.

Dilka Cali Cabdalle Saalax, ayaa la aaminsan yahay inay dab ku sii shidi doonto Dagaalka ka socday Dalka Yemen Dhowrkii Sannadood ee u dambeeyay, kaasi oo sababay dhimashada kumanaan Qof iyo Barakaca Dhowr Milyan oo Qof.

Dhamaysnews.com/Hargeisa Office

Leave a Reply

Open chat
soo dhawoow walaal